domingo, 20 de julio de 2008

Emprenzipiamos


Ista ye a primer semana de bida d'o blog. Ya caleba que a Colla Antitaurina Oszense tornase de nuebas, drento d'as nuestras posibilidaz, y continase con o suyo treballo dimpués de más de diez años en os que, con momentos si fa u no fa actibos, emos mirato de fer a nuestra aportazión ta lograr una ziudá, un país y un mundo menos cruel.

L'aparixión d'o blog coinzide con as fiestas de San Lorién bien zerqueta y de resultas con a realizazión en un mes d'"espectaclos" con animals en a ziudá. Cuan de Monzón nos arriban notizias de como o suyo equipo de gubierno, a iniziatiba d'o conzellero Miguel Aso, d'IU, fa una apuesta por pribar que os zircos cruels s'instalen en a ziudá; en Uesca imos de mal en pior. Como si ya no estase poco que se dé bía libre a os zircos cruels, que se premita a instalazión de carrusels de ponis en as ferias, as "corridas" de toros, as vaquillas, as carreras de burros... una begata más reaparix a posibilidá de que se faigan "encierros" en a ziudá.

En cuenta d'apostar por un nuebo modelo de soziedá más respetuoso con os animals año par d'atro Uesca fa toz os posibles por meter-se debán en a lista de ziudaz cruels con os animals. Ta ixo ye allí l'alcalde soziata, Fernando Elboj, y o suyo equipo de gubierno perén dispuesto a refirmar, ya sía con a suya presenzia u con diners publicos, tot o relazionato con a crueldá enta os animals. Asperemos que, antes con antes, os grupos d'a oposizión dispierten, paren cuenta, y tiengan a balor ta, seguindo o exemplo de Monzón, dixar d'acachar o tozuelo debán d'a crueldá y trasladar a boz d'os sin boz t'os plenos.

Aquí ranca, pos, iste nuebo blog. I replegaremos as notizias que leigamos u que nos faigaz plegar en o tocante a temas animalistas en Aragón, asinas como bella notizia de caráuter internazional, recopilaremos biellos articlos amanexitos en prensa u publicatos en atros blogs chunto, ye de dar, a aquels que s'escriban a esprés ta publicar-los aquí. Emprenzipiamos.

 

No hay comentarios:

Publicar un comentario